10 rheswm i ymweld â’r Senedd yr haf hwn

View this post in English | Darllenwch yr erthygl yma yn Saesneg

Chwilio am rywbeth i’w wneud y penwythnos hwn? Beth am fynd i Fae Caerdydd i ymweld â’r Senedd?

O wleidyddiaeth i bensaernïaeth, o gelf i gynhyrchion Cymreig, mae gan y Senedd rywbeth at ddant pawb.

1. Y bensaernïaeth a’r dyluniad sydd wedi ennill gwobrau

Mae’r Senedd yn wirioneddol unigryw. Mae’n well edrych ar y twmffat a’r canopi enfawr o bren cedrwydd Canada cynaliadwy o’r tu mewn i’r adeilad, lle gallwch archwilio ar ddwy lefel.

2. Archwilio llwybr y Senedd

Ydych chi’n chwilio am weithgareddau difyr, rhad ac am ddim i blant i’w mwynhau’r penwythnos hwn? Gall fforwyr bach deithio drwy’r canrifoedd ar ein llwybrau i blant.  Chwiliwch y Senedd a chasglwch y cliwiau – a dysgwch lawer o ffeithiau diddorol ar hyd y ffordd. Rhowch eich cerdyn wedi’i orffen yn ôl i’r Dderbynfa a chewch gynnig yn y raffl i ennill gwobr!

3. Gweld beth sy’n digwydd y tu ôl i’r llenni

Dros yr haf mae ein teithiau tywys arferol yn cynnwys mynediad unigryw i ardaloedd nad ydynt fel arfer ar agor i’r cyhoedd. Bydd ein tywyswyr cyfeillgar, arbenigol yn mynd â chi ar daith drwy hanes y Bae i bensaernïaeth y Senedd a Chymru heddiw.
Gorau oll, mae’r teithiau am ddim ac yn rhedeg yn ddyddiol am 11.00 / 14.00 / 15.00

4. Mwynhau blas o Gymru yn ein caffi a’n siop

Mae diwrnod o archwilio’r Bae yn galw am baned a chacen yn ein caffi. Dewiswch o amrywiaeth o luniaeth a mwynhewch olygfeydd hyfryd o’r Bae drwy ffenestri enfawr y Senedd. Wrth ymyl y caffi mae’r siop, sy’n cadw cynnyrch, llyfrau ac anrhegion Cymreig.

5. Edrych ar gelf

Bydd y Senedd yn cynnal arddangosfeydd newydd gwych drwy gydol yr Haf.

Gallech greu eich cerdyn post eich hun o Gymru wedi’i ysbrydoli gan osodiad enfawr Steve Knapik MBE a’i bostio yn ein blwch post.
Dysgwch am hanes Bae Caerdydd drwy hen luniau du a gwyn Jack K Neale o longau yn hwylio allan o Ddociau Bute, gan gludo glo De Cymru yn ôl i Ffrainc.
Neu meddyliwch am yr hyn y byddech chi’n ei ychwanegu at Drawn Together, prosiect cenedlaethol a oedd yn gwahodd pobl i gymryd pum munud i dynnu llun rhywbeth y gallent ei weld. Cyfrannodd dros 4,500 o bobl gyda lluniau wedi dod o bob sir yng Nghymru.

6. Y tîm diogelwch mwyaf cyfeillgar yng Nghaerdydd

Fel gydag unrhyw adeilad seneddol, mae’n ofynnol i bob ymwelydd fynd drwy broses ddiogelwch fel yn y maes awyr ar ei ffordd i mewn i’r Senedd. Fodd bynnag, mae ein tîm diogelwch yn gwneud eu gorau i greu argraff gyntaf dda. Dyma ddetholiad bach iawn o’r nifer fawr o sylwadau a gawsom amdanynt ar Trip Advisor:

“Wedi gorfod mynd drwy broses ddiogelwch, ond roedden nhw y mwyaf cyfeillgar imi ddod ar eu traws (Heathrow, cymerwch sylw)”
Celticfire

“Yr adeilad llywodraeth mwyaf cyfeillgar imi ymweld ag ef erioed! Adeilad hardd a diddorol gyda’r staff mwyaf cyfeillgar imi ddod ar eu traws erioed. Roedd hyd yn oed y tîm diogelwch yn hyfryd, gan sicrhau trosglwyddiad hawdd, diogel i’r adeilad.”
Gillyflower58


“Proses ddiogelwch fel yn y maes awyr yn cael ei chyflawni gan staff hapus a chyfeillgar iawn.”
138Paul138

Wnaethom ni sôn bod gennym hefyd Dystysgrif Ragoriaeth Trip Advisor?

7. Mwynhau dyluniad amgylcheddol y Senedd

Poeth ym Mae Caerdydd? Mae dyluniad unigryw y Senedd yn ei chadw’n hyfryd ac yn oer ar ddyddiau’r haf. Mae ei ffenestri yn agor ac yn cau’n awtomatig er mwyn helpu i reoleiddio’r tymheredd y tu mewn.

8. Helpu ni i ddathlu 20 mlynedd

Eleni rydym yn dathlu 20 mlynedd o Gynulliad Cenedlaethol Cymru. Rhannwch eich dyheadau ar gyfer Cymru dros yr 20 mlynedd nesaf ar ein bwrdd.

9. Mae gennym Lego®, Duplo® a gweithgareddau ar gyfer y rhai bach

Os ydych chi’n teimlo’n ysbrydoledig ar ôl gweld dreigiau, tywysogesau a dewiniaid Bright Bricks, dewch draw i ychwanegu eich creadigaeth Lego® eich hun i’n map o Gymru. Drwy gydol y gwyliau mae gennym hefyd daflenni lliwio a chrefftau ar gael i ddiddanu’r rhai bach wrth ichi fwynhau egwyl fach.

10. Mae am ddim!

A faint mae’n ei gostio i gael mynediad at hyn i gyd, fe’ch clywaf yn gofyn? Dim byd. Mae’r Senedd yn adeilad cyhoeddus – eich adeilad chi – ac rydyn ni ar agor 7 diwrnod yr wythnos. P’un a ydych chi’n ymweld â Chaerdydd am y penwythnos neu’n rhywun lleol nad ydych erioed wedi mentro y tu mewn, ewch i lawr i’r Senedd yr haf hwn wrth inni ddathlu 20 mlynedd Cynulliad Cenedlaethol Cymru.

Ein Cynulliad Dinasyddion cyntaf

Ar benwythnos 19 – 21 Gorffennaf, ymgasglodd 58 o’r 60 o bobl a ddewiswyd fel rhai sy’n cynrychioli poblogaeth Cymru yn Neuadd Gregynog, yn y Canolbarth, i gymryd rhan yn ein Cynulliad Dinasyddion cyntaf. Penderfynodd Comisiwn y Cynulliad gynnal y Cynulliad Dinasyddion hwn fel rhan o’i ddathliadau 20 mlynedd.

Roedd gan y Cynulliad Dinasyddion ddau gwestiwn i’w ystyried:

  • Sut y gall pobl yng Nghymru lywio eu dyfodol?
  • Pa feysydd datganoledig sy’n gweithio’n arbennig o dda a pha rai sy’n herio Cymru?

Cyfranogwyr y Cynulliad Dinasyddion

Dewiswyd chwe deg o gyfranogwyr, o blith ymgeiswyr o 10,000 o aelwydydd a ddewiswyd ar hap, i gymryd rhan. Roeddent yn gynrychioliadol o safbwynt demograffig o’r boblogaeth yng Nghymru. Nid oedd gan oddeutu 75 y cant radd prifysgol, nid oedd gan 25 y cant unrhyw TGAU neu gymhwyster cyfwerth, ac ni phleidleisiodd 60 y cant yn etholiad Cynulliad Cenedlaethol Cymru (y Cynulliad) yn 2016. Gan hynny, roedd y gymanfa wleidyddol hon yn wahanol i unrhyw un arall a gafwyd dros yr ugain mlynedd diwethaf yng Nghymru.

Roedd y 60 unigolyn a ddewiswyd i gymryd rhan yn y digwyddiad hwn yn gynrychioliadol o boblogaeth Cymru 16 oed a hŷn o ran:

Oedran:

  • 16-29 – 23.5 y cant (14-15)
    • 39-44 – 22.4 y cant (13-14)
    • 45-59 – 23.9 y cant (14-15)
    • 60+ – 30.2 y cant (18)

Lefel addysg:

  • Dim cymwysterau – 25.9 y cant (15-16)
    • Lefel 1 neu 2 – 29 y cant (17-18)
    • Lefel 3 neu brentisiaeth neu arall – 20.5 y cant (12-13)
    • Lefel 4 neu uwch – 24.5 y cant (14-15)

Daearyddiaeth:

  • 12 o bobl o bob un o’r 5 rhanbarth etholiadol.

Ethnigrwydd:

  • Gwyn – 95.6 y cant (50)
  • BAME – 4.4 y cant (10 – penderfynwyd gor-gynrychioli’r categori hwn)

Nifer a bleidleisiodd yn etholiad 2016

  • Wedi pleidleisio – 40.7 y cant (24-25)
    • Anghymwys neu heb bleidleisio – 59.3 y cant (35-36)

Sgiliau Cymraeg (siarad, darllen, ysgrifennu, deall neu ryw gyfuniad o’r fath):

  • Oes – 26.7 y cant (16)
    • Nac oes – 73.3 y cant (44)

Rhyw (hunan-ddynodedig):

  • Gwryw – 51 y cant (30-31)
    • Benyw – 49 y cant (29-30)
    • Arall – 0 y cant (ni ddewisodd neb y categori hwn)

Penwythnos y Cynulliad Dinasyddion

Dechreuodd y Cynulliad Dinasyddion gyda chyfranogwyr yn ystyried y meysydd sydd wedi’u datganoli i Gymru. Cyflwynodd panel o siaradwyr wybodaeth gefndirol am y Cynulliad, ei gyllideb, ei bwerau a’i rôl. Yna gofynnwyd i’r cyfranogwyr nodi ar bapur:

Daeth y cyfranogwyr i gasgliadau ar y meysydd yr oeddent yn teimlo bod Cymru yn gwneud yn dda mewn perthynas â hwy, a’r meysydd yr oeddent o’r farn eu bod yn cynnig yr her fwyaf i Gymru.

“Clywais lawer o safbwyntiau diddorol ac amrywiol o amgylch y bwrdd – hoffwn weld rhai o’r rhain yn cael eu gweithredu”.


Niz, aelod o’r Cynulliad Dinasyddion.

Yna, canolbwyntiodd y cyfranogwyr ar y prif gwestiwn yr oedd Cynulliad Dinasyddion hwn i fod i roi sylw iddo, sef sut y maen nhw – pobl Cymru – am allu llywio eu dyfodol drwy waith y Cynulliad.

Clywodd y cyfranogwyr gan siaradwyr arbenigol a gyflwynodd dystiolaeth i’r Cynulliad Dinasyddion ynghylch y ffyrdd y gallant wneud hyn eisoes. Yn dilyn hynny, gwnaethant ganolbwyntio ar y ffyrdd ychwanegol y gallai pobl yng Nghymru wneud hyn yn y dyfodol.

Canolbwyntiodd y cyfranogwyr ar y swyddogaethau a ganlyn:

  1. Ffyrdd o lywio’r dyfodol drwy ddylanwadu ar waith pwyllgorau.
  2. Ffyrdd o lywio’r dyfodol drwy ymgysylltu â’r broses ar gyfer cymeradwyo’r gyllideb ddrafft.
  3. Ffyrdd o lywio’r dyfodol drwy ofyn cwestiynau i’r Llywodraeth.
  4. Ffyrdd o lywio’r dyfodol drwy helpu i osod agenda’r Cynulliad (e.e. y broses ddeisebau, Senedd Ieuenctid Cymru).

Adborth gan gyfranogwyr:

Llenwodd yr holl gyfranogwyr ffurflen adborth ar ddiwedd penwythnos y Cynulliad Dinasyddion, gan roi eu barn ynghylch a oedd cymryd rhan yn y Cynulliad Dinasyddion wedi newid eu teimladau neu beidio o ran cyfrannu at y broses o wneud penderfyniadau yn fwy cyffredinol.

  • Cytunodd 91 y cant o’r cyfranogwyr yn gryf fod cymryd rhan yn y Cynulliad Dinasyddion hwn wedi eu gwneud yn fwy awyddus i gymryd rhan mewn agweddau eraill ar y broses o wneud penderfyniadau.
  • Cytunodd 93 y cant yn gryf eu bod yn teimlo’n fwy hyderus i gymryd rhan yn y broses o wneud penderfyniadau gwleidyddol yn sgil cymryd rhan yn y Cynulliad Dinasyddion.

“Roedd y profiad o ddod yma, cwrdd â llawer o bobl wahanol, a gwrando ar safbwyntiau gwahanol yn wych – roedd yn benwythnos da iawn.”

Sarah, aelod o’r Cynulliad Dinasyddion

Yr adroddiad

Mae adroddiad ynghylch y Cynulliad Dinasyddion wrthi’n cael ei ddrafftio. Bydd yr adroddiad yn ystyried y materion a ganlyn:

1. Yr hyn y mae cyfranogwyr yn ei werthfawrogi fwyaf am Gymru fel y mae ar hyn o bryd;

2. Yr hyn y mae cyfranogwyr yn ei ystyried fel yr heriau mwyaf sy’n wynebu Cymru;

3. Manteision ac anfanteision pob ffordd ychwanegol o lywio’r dyfodol;

4. Trefn dewis y cyfranogwyr o ran datblygiadau arloesol ym mhob un o’r pedair swyddogaeth a drafodwyd, a pham;

5. Trefn dewis y cyfranogwyr o ran yr holl ddatblygiadau arloesol, a pham;

6. Barn y cyfranogwyr ynghylch a ddylid ystyried mabwysiadu pob datblygiad arloesol ai peidio, a pham.

Bydd hyn yn rhoi dealltwriaeth ragorol i’r Cynulliad o’r hyn y mae pobl yng Nghymru yn ei ystyried fel yr heriau mwyaf a sut yr hoffai pobl yng Nghymru allu llywio eu dyfodol drwy waith y Cynulliad.

Y nod yw cyhoeddi’r adroddiad mewn digwyddiad cyhoeddus yn ystod Gŵyl Wleidyddiaeth Gwlad ddiwedd mis Medi, a bydd Comisiwn y Cynulliad yn trafod ei ymateb yn nhymor yr hydref.

Y tîm sy’n gyfrifol am y Cynulliad Dinasyddion

Casglwyd y dystiolaeth a’r wybodaeth i’r cyfranogwyr gan arweinwyr arbenigol y Cynulliad Dinasyddion, sef: Yr Athro Graham Smith, Athro Gwleidyddiaeth a Chyfarwyddwr y Ganolfan Astudio Democratiaeth ym Mhrifysgol Westminster a Dr Huw Pritchard, darlithydd y Gyfraith ym Mhrifysgol Caerdydd ac aelod o Ganolfan Llywodraethiant Cymru. Helpodd Huw drwy gasglu gwybodaeth gefndirol ar gyfer y Cynulliad Dinasyddion.

Hefyd, cydlynodd grŵp llywio Comisiwn y Cynulliad waith craffu a dadansoddi mewnol, ac fe roddodd Cymdeithas Hansard feirniadaeth ddiduedd allanol.

Yn ogystal â hynny, rhoddodd y siaradwyr arbenigol, sy’n academyddion ac ymarferwyr blaenllaw yn y maes hwn, gyngor ar ba mor gynhwysfawr, cywir a chytbwys oedd y dystiolaeth yr oedd y Cynulliad i’w chlywed ar y cyfleoedd sydd i’w cael nawr ac yn y dyfodol i bobl yng Nghymru lywio eu dyfodol. 

Roedd siaradwyr gwadd y Cynulliad Dinasyddion yn cynnwys yr arweinwyr arbenigol, ynghyd â Dr Alan Renwick, Coleg Prifysgol Llundain, Dr Diana Stirbu, Prifysgol Metropolitan Llundain, Dr Clodagh Harris, Coleg Prifysgol Corc, yr Athro Cristina Leston-Bandeira, Prifysgol Leeds a Rebecca Rumbul, Ymchwilydd Arweiniol gyda My Society.

Comisiynodd Comisiwn y Cynulliad ddau sefydliad blaenllaw i gyflwyno a recriwtio’r Cynulliad Dinasyddion, sef y Sortition Foundation, sy’n darparu datrysiadau haenedig dethol ar hap, a’r Involve Foundation, prif elusen cyfranogiad cyhoeddus y DU.

Llond Gwlad o Dalent Greadigol

Steve Knapik MBE sy’n sôn am ei arddangosfa, ‘Cerdyn Post o Gymru’, sy’n agor yn y Senedd ar 27 Gorffennaf 2019.

Rwy’n artist, ond rwyf hefyd yn angerddol am fy ngwaith gyda’r elusen i blant, Blue Balloon. Drwy’r elusen hon, mae llawer o bobl yn gweithio’n galed i wella bywydau plant yng Nghymru.  Ychydig flynyddoedd yn ôl, roeddwn i am helpu Blue Balloon drwy drefnu prosiect celf enfawr i greu tirlun mawr, mawr iawn; mor fawr, a dweud y gwir, roeddwn i’n gobeithio torri Record Guinness y Byd am y tirlun parhaus hiraf erioed. Roeddwn i’n gwybod y byddai’n llawer o waith, felly gofynnais am help gan lawer o wahanol bobl, gan gynnwys disgyblion ysgolion cynradd, grwpiau sy’n cefnogi pobl sy’n byw â dementia, a disgyblion ysgolion sydd ag anghenion ychwanegol. Roedd hi’n bwysig i mi gynnwys amrywiaeth o bobl i wneud yn siŵr bod y prosiect yn cynnwys ac yn croesawu pawb.

Gwnaethom ni weithio’n galed am bum mlynedd. Roedd trefnu popeth yn dipyn o waith, ond roedd e’n werth chweil i weld y cyffro a’r mwynhad ar wynebau pawb. Er mwyn torri Record Guinness y Byd, roedd angen o leiaf 30,000 o ddarluniadau arnom, felly roedd llawer o waith i’w wneud! Roedd llinellau ar bob darlun yn dangos ble roedd y mynyddoedd a’r awyr, ac roedd hyn yn golygu bod modd cyfuno’r lluniau i greu un gwaith celf mawr. Gwelais lawer o dalent greadigol a ffyrdd llawn dychymyg o feddwl am ein tirweddau. Er enghraifft, defnyddiodd rhai o’r plant ysgol gynradd flociau o streipiau lliw i gynrychioli caeau.

Roedd pawb yn gyffrous am ein hymdrech i dorri Record y Byd. Roedd hyd yn oed Stadiwm Liberty yn Abertawe yn barod i ni arddangos dros bum milltir o ddarluniadau gwreiddiol wedi’u cyfuno…

Ac yna, newyddion gwael! Gwnaethom ni glywed nad oedd modd cofrestru ein prosiect fel record byd. Roeddwn i’n drist ac yn siomedig iawn. Beth oeddwn i’n mynd i’w wneud â’r holl ddarluniau gwych? Ond roeddwn i’n benderfynol na fyddwn i’n cael fy nhrechu. Roedd y gweithiau celf anhygoel hyn yn haeddu cael eu harddangos. Roedd angen adeilad eiconig a phwysig arnaf i arddangos y dalent a’r creadigrwydd a welais gan blant ledled Cymru.

Cysylltais â Chynulliad Cenedlaethol Cymru a chwrdd ag Alice sy’n guradur yno. Mae hi’n gweithio gydag artistiaid i drefnu arddangosfeydd. Pa le gwell i arddangos y gweithiau celf gwych hyn na’r Senedd, cartref democratiaeth yng Nghymru, lle mae pobl yn gwneud penderfyniadau pwysig am yr hyn sy’n digwydd yn ein gwlad? Cwrddais i ag Alice a buom yn siarad am greu arddangosfa o’r tirluniau yn y Senedd. Fe dreuliom ni lawer o amser yn cynllunio, ac o’r diwedd, roeddem ni’n barod i roi’r arddangosfa at ei gilydd er mwyn i bawb ei mwynhau.

Rwy’n teimlo mai’r Senedd fydd y lle perffaith i ddangos ein gwaith celf, ac rwy’n edrych ymlaen at gael hyd yn oed mwy o bobl i gymryd rhan, drwy annog ymwelwyr â’r Senedd i wneud cardiau post i’w hanfon, ac i ddathlu llawer o bethau cyffrous sy’n digwydd yn y Cynulliad eleni…

Ugainmlwyddiant Cynulliad Cenedlaethol Cymru

Roedd yn gymaint o anrhydedd cael fy newis i fod yn rhan o’r dathliad pwysig hwn. Crëwyd Cynulliad Cenedlaethol Cymru 20 mlynedd yn ôl, ac mae’r adeilad hardd hwn yn lle gwych ar gyfer dathliad mawr. Mae’r adeilad ar agor i’r cyhoedd, ac rwy’n falch iawn i’ch gwahodd CHI, y cyhoedd, i fentro mewn a chymryd rhan wrth greu eich tirlun unigryw eich hun. Rwy’n gobeithio y cewch chi gymaint o hwyl â dros 30,000 o blant ac oedolion o’ch blaen wrth gymryd rhan yn ein prosiect.

Senedd Ieuenctid Cymru

Ym mis Chwefror eleni, cyfarfu Senedd Ieuenctid Cymru, sy’n cynnwys 60 o bobl ifanc 11-18 oed, am y tro cyntaf. Rydym ni am helpu i ddathlu’r digwyddiad gwych hwn a sefyll ochr yn ochr â’r 60 aelod sy’n cynrychioli pob rhan o Gymru. Mae gan bob aelod ddiddordeb mawr mewn elfennau o fywyd sy’n effeithio ar bobl ifanc heddiw. Mae mor bwysig i’n pobl ifanc gael llais, ac mae’r Senedd Ieuenctid yn gweithio’n galed i sicrhau bod y llais hwnnw’n cael ei glywed. Fe wnaeth rhai aelodau o’r Senedd Ieuenctid hyd yn oed gymryd rhan yn fy mhrosiect pan oedden nhw yn yr ysgol!

Arwyddair yr elusen i blant, Blue Balloon, yw ‘Gobaith heddiw am well yfory’, ac mewn sawl ffordd, mae’n berthnasol i’r bobl ifanc hyn sy’n cynrychioli lleisiau holl bobl ifanc Cymru ac yn helpu i wneud gwahaniaeth.

Y celfyddydau fel rhan o’n Cymreictod

Mae gan Gymru fel cenedl ymdeimlad cryf o berthyn a hunaniaeth. Mae hyn i’w weld mewn sawl ffordd, yn enwedig drwy’r celfyddydau. Rydym ni’n dathlu Cymru fel gwlad y gân, felly mae cerddoriaeth yn rhan gref o’n treftadaeth; ond mae barddoniaeth, drama a’r celfyddydau gweledol yn bwysig iawn hefyd. Gall pob math o bethau ein hysbrydoli. Mae artistiaid wedi eu swyno gan dirweddau Cymru ers canrifoedd: y mynyddoedd, y môr a’r awyr.

Mae’n bwysig i ni edrych yn fanwl ar ein hamgylchedd agos, ac wrth siarad â phobl ifanc a phobl nad oedden nhw mor ifanc yn ystod y prosiect, gwnaethom drafod llawer o bethau sy’n effeithio ar ble rydym ni’n byw. Gall yr amgylchedd o’n cwmpas helpu i ddechrau trafodaeth, a gwnaethom ddangos ein teimladau am ein hamgylchedd drwy ein tirluniau. Rhaid i ni beidio byth â cholli golwg ar bwysigrwydd y celfyddydau mewn cymdeithas a sut gallan nhw fod yn bositif iawn i’n llesiant a’n synnwyr o bwy ydym ni.

Niwroamrywiaeth yn y gweithle

Amrywiaeth a Chynhwysiant

Niwroamrywiaeth yn y gweithle

Mae niwroamrywiaeth yn ymwneud â chydnabod bod pobl yn amgyffred pethau’n wahanol. I’r rhan fwyaf o bobl, mae’r ymennydd yn gweithio ac yn dehongli gwybodaeth mewn ffordd debyg, ond mae rhai pobl yn dehongli gwybodaeth mewn ffyrdd gwahanol. Dim ond ffordd arall o ymgysylltu â’r byd o’ch cwmpas yw hyn.

Pam mae’n bwysig i sefydliadau dderbyn a chefnogi niwroamrywiaeth yn y gweithle

Mae sefydliadau’n sylweddoli bod amrywiaeth o sgiliau, profiadau, safbwyntiau a chefndiroedd yn meithrin arloesedd, a bod hyn yn ei dro yn gallu gwella cynhyrchiant, bodloni anghenion cwsmeriaid yn well a dylanwadu ar y cynhyrchion a’r gwasanaethau a gynigir.

Yn ôl Cymdeithas Genedlaethol Awtistiaeth, dim ond 16 y cant o oedolion ag awtistiaeth sydd mewn gwaith llawn amser. Mae llawer o bobl ag awtistiaeth yn gallu gweithio ac maent yn awyddus i gael swydd sy’n gydnaws â’u doniau a’u diddordebau. Gydag ychydig o ddealltwriaeth a mân addasiadau yn y gweithle, gallant fod yn gaffaeliad go iawn i fusnesau ledled y DU.

Beth rydym ni’n ei wneud i ddenu pobl niwrowahanol a’u cadw

  • Rydym wedi codi ymwybyddiaeth o gyflyrau niwrowahanol, fel awtistiaeth, ymhlith cydweithwyr a rheolwyr, fel eu bod mewn sefyllfa dda i gefnogi cydweithwyr niwrowahanol yn y gweithle.
  • Rydym wedi darparu hyfforddiant i reolwyr llinell ar gefnogi a rheoli cydweithwyr sydd ag awtistiaeth.
  • Rydym bob amser yn mireinio ein swydd-ddisgrifiadau i roi syniad cliriach i ymgeiswyr am y rôl dan sylw.
  • Rydym wedi cymryd camau i ddiweddaru ein pecynnau ymgeiswyr ac rydym yn y broses o ailwampio ein gwefannau recriwtio i sicrhau hygyrchedd i bawb.
  • Ar hyn o bryd, rydym yn adolygu ein prosesau recriwtio i gynyddu cynhwysiant drwy sicrhau bod ein gwerthoedd yn cyd-fynd â’n proses recriwtio.
  • Rydym yn gweithio gydag ymgeiswyr i ddeall pa gymorth, os o gwbl, y bydd ei angen arnynt os cânt eu penodi. Gall y cymorth hwn gynnwys addasiadau synhwyraidd, megis darparu mannau tawel i weithio, meddalwedd cynorthwyol, clustffonau canslo sŵn, cyfeillio, a chymhorthion synhwyraidd.

 Mae Comisiwn y Cynulliad yn un o lofnodwyr Ymgyrch Hyderus o ran Anabledd y Llywodraeth – rydym yn Gyflogwr Hyderus o ran Anabledd ac rydym hefyd wedi cael gwobr gan Gymdeithas Genedlaethol Awtistiaeth am fod yn ystyriol o awtistiaeth.

“Fel rhywun sydd â diagnosis o Awtistiaeth ac ADHD sy’n gyflogai yng Nghomisiwn y Cynulliad, rwy’n teimlo fy mod yn cael fy nerbyn am bwy ydw i, fel person sy’n byw gyda’r anableddau hyn. Mae’r sefydliad wedi bod yn gefnogol iawn o ran fy nymuniad i weithio rhan amser gan mai hyn sy’n addas at fy anghenion.

Roedd yn anrhydedd mawr traddodi cyflwyniad am awtistiaeth mewn sesiwn hyfforddi staff lle cefais y cyfle i siarad am fy mhrofiadau personol yn hyn o beth. Roedd y sesiwn hyfforddi arbenigol hon yn help mawr i fi a’m rheolwr llinell ddeall fy anghenion, a gwnaed addasiadau rhesymol o ganlyniad.

Edrychaf ymlaen at barhau i ddatblygu mwy o sgiliau a phrofiad yn ystod fy nghyflogaeth yma ac at barhau i gyfrannu yn frwd at waith bob dydd y sefydliad. ”

Cyflogai Comisiwn y Cynulliad

Hyrwyddo Gweithle sy’n Ystyriol o Deuluoedd

Wythnos Amrywiaeth a Chynhwysiant

Yr wythnos hon, rydym yn dathlu Amrywiaeth a Chynhwysiant. Yma yn y Cynulliad, rydym yn gweithio’n ddiflino tuag at ddatblygu polisïau a gweithdrefnau sy’n cefnogi ein nod o fod yn gyflogwr cynhwysol, sy’n ein helpu i ddatblygu diwylliant sefydliadol lle gallwch fod fel chi eich hunain, ond gallwch hefyd ffynnu a chyflawni eich potensial.

Rydym yn gweithio gyda’n Rhwydweithiau Cydraddoldeb yn y Gweithle i sicrhau y gall ein staff siarad â phobl o’r un anian. Gall staff sydd â nodwedd warchodedig ddod at ei gilydd a chefnogi ei gilydd, yn ogystal â chynnig cyngor ar sut y gallwn ddod yn gyflogwr mwy cynhwysol.

Rydym yn cydnabod ei bod yn mynd yn anos anos cadw’r ddysgl yn wastad rhwng gwaith a bywyd bob dydd, felly rydym yn falch o allu cynnig ystod o drefniadau gweithio hyblyg, yn cynnwys oriau hyblyg, gweithio rhan amser, gweithio gartref, cyfleoedd rhannu swydd, a seibiannau gyrfa. Mae ein trefniadau gweithio hyblyg yn golygu ein bod yn gyson ar restr y 30 o Gyflogwyr Gorau ar gyfer Teuluoedd sy’n Gweithio.

TEULU yw ein rhwydwaith cydraddoldeb yn y gweithle i rieni a gofalwyr sy’n gweithio, a’i bwrpas yw:

  • codi ymwybyddiaeth a dealltwriaeth o’r anghenion a’r rhwystrau i gynhwysiant yn y gweithle;
  • dylanwadu ar ystod o bolisïau, gwasanaethau a hyfforddiant ar faterion a allai effeithio ar rieni a gofalwyr sy’n gweithio, a’u datblygu;
  • hyrwyddo hawliau a chyfranogiad rhieni a gofalwyr sy’n gweithio ym mhob agwedd ar bolisïau, arferion a gweithdrefnau yng Ngwasanaethau Seneddol y Cynulliad;
  • cyfrannu’n weithredol at y gwaith o ddatblygu ac adolygu polisïau perthnasol trwy asesiadau effaith cydraddoldeb; a
  • chasglu a hyrwyddo gwybodaeth am amrywiaeth o faterion sy’n berthnasol i rieni a gofalwyr sy’n gweithio

Fy Wythnos Profiad Gwaith: Iwan Kellett

Fy enw yw Iwan Kellett a dwi’n fyfyriwr chweched dosbarth yn Ysgol Syr Thomas Jones, Amlwch. Dros yr wythnos o’r 17eg i’r 21ain o Fehefin cefais gyfle i fynd ar brofiad Gwaith i Swyddfa Etholaeth Rhun ap Iorwerth AC Ynys Môn, a roeddwn yma am 3 diwrnod o’r wythnos. Am y ddau ddiwrnod arall cefais fynd i Swyddfa Rhun ap Iorwerth yn Nhŷ Hywel, Caerdydd.

Felly, ar fy niwrnod cyntaf roeddwn yn y Swyddfa Etholaeth yn Llangefni. Yn syth bin synnais wrth weld yr amrywiaeth o waith a oedd yn digwydd. Yn y bore, aethom i ymweld ag arddangosfa wych yn Hwb MENCAP yn dangos portreadau o ddefnyddwyr yr Hwb. Wedyn yn ôl yn y swyddfa dysgais sut mae’r swyddfa yn rhoi cymorth a helpu etholwyr. Yn y pnawn fe aethom i Gors Goch yn Llanbedrgoch i ddysgu mwy am waith Ymddiriedolaeth Natur Gogledd Cymru yno. Roedd yn anhygoel dysgu fy mod yn byw mor agos i ardal sydd mor bwysig o ran ei natur, ac erioed wedi bod yno o’r blaen!

Am y ddau ddiwrnod nesaf, hedfanais lawr i Gaerdydd o Fali i fynd i’r swyddfa yn Nhŷ Hywel, Bae Caerdydd.  Roedd yna ddyn arall ar fentoriaeth o’r enw Mo felly ar ôl cyrraedd aethom am tour o’r safle a chael gwybod mwy am sut mae’r Senedd a Thŷ Hywel yn gweithio. Ar ôl cyrraedd yn ôl i’r swyddfa cyfieithais ddogfen i’w rhyddhau i’r wasg yna yn syth wedyn aethom i ymweld â’r BBC a oedd yn rhedeg digwyddiad i drafod materion darlledu yng Nghymru. Yna ar ôl cinio es i eistedd a gwrando ar FMQ’s. Mae’n rhaid dweud, o’n i ychydig bach yn ‘starstruck’ yn cerdded o gwmpas yn gweld yr Aelodau’r Cynulliad gwahanol. Ges i hyd yn oed fy llyfr wedi ei lofnodi gan Adam Price! Lawr yng Nghaerdydd mi wnes i helpu ysgrifennu araith hefyd a mynd i gyfarfod i gymryd nodiadau.

Am weddill yr wythnos roeddwn yn ôl yn Llangefni yn ymateb i boenau etholwyr ac yn trio eu helpu ac ysgrifennu e-bostion i drio rhoi cymorth a helpu nhw ynglyn ag amrywiaeth mawr o faterion.

Mae’r wythnos wedi bod yn anhygoel! Dwi wedi dysgu cymaint o bethau ac mae’r profiad go wir wedi bod yn wych! Mae wedi bod yn agoriad llygaid i’r holl waith mae’r swyddfa yn ei wneud ac wrth gwrs yr Aelod Cynulliad. O wrando ar faterion cenedlaethol yn y siambr i glywed problemau lleol yn y swyddfa. I unrhyw un sydd yn meddwl am fynd ar brofiad Gwaith i’r swyddfa, gwnewch! Mae wedi bod yn brofiad anhygoel, diolch i Rhun ap Iorwerth a Non ap Gwyn (Rheolwr y Swyddfa) am wythnos grêt.

Chwiliwch am yr heulwen yn y glaw

Erthygl wadd gan Bleddyn Harris, Swyddog Datblygu a Hyfforddi Sefydliadol – Cynulliad Cenedlaethol Cymru. Wythnos Amrywiaeth a Chynhwysiant.

Enfys

Enw

Bwa o liwiau sy’n weladwy yn yr awyr, a achosir gan blygiant a gwasgariad golau’r haul gan law neu ddiferion dŵr eraill yn yr atmosffer.

Pan ddyluniodd Gilbert Baker y faner enfys, tybed a wnaeth erioed ddeall sut – ynghyd â bod yn brotest gwych ac aruchel yn erbyn y gwahaniaethu amhriodol yn erbyn cariad a hunaniaeth – y mae’n crynhoi’n berffaith profiad nifer o unigolion LGBTQ sydd wedi’i defnyddio fel tarian mewn byd y mae’n ymddangos nad yw eu heisiau nhw: heulwen a glaw, i gyd ar unwaith.

Wrth feddwl am fod yn hoyw, rwy’n aml yn dod i’r casgliad mai hwn yw’r profiad mwyaf poenus ac iachusol yr wyf wedi’i brofi. Nid oherwydd bod bod yn hoyw yn brofiad poenus, ond mae wedi bod yn esgus i gymaint o bobl ei ddefnyddio pan fyddant wedi fy ngadael yn gignoeth ac wedi fy ninoethi, yn aml, ac yn baradocsaidd, yn enw ‘cariad’. Mae wedi bod yn gatalydd i bobl nad ydynt yn fy adnabod, na fyddant byth yn fy nghyfarfod, na fyddant byth yn fy nerbyn i, na fyddant byth yn fy ngharu, i alw i gael fy ngwneud yn anghyfreithlon, i ddileu fy hanes, i fod eisiau fy ngweld yn y carchar, i feddwl am roi cweir i mi, i fy atal rhag priodi, i fod eisiau i mi farw. Felly, nid yw’n fyd o ungyrn a breninesau drag i gyd.

Dydw i ddim wir yn hoffi dweud bod bod fy ngwir hunan er gwaethaf y mathau o bobl rydw i wedi’u henwi uchod oherwydd rwy’n teimlo ei fod yn priodoli’r holl frwydrau yr wyf wedi gorfod eu hennill gyda fy hunan-barch a hunan-dderbyn i griw o bobl na fydd byth yn poeni… ond, ie, mae bod fy hun yn llwyr er gwaethaf y bobl hynny oherwydd rwyf eisiau iddyn nhw wybod na fyddaf yn gadael i’w rhagfarn fy rhwystro rhag byw fy mywyd yn llawn lliw a gyda’r cariad maent yn ceisio ei wadu i mi.

Rwy’n gwybod, rwy’n gwybod, rwy’n rhygnu ymlaen am agweddau negyddol y profiad hwn, ond dim ond gan fy mod i’n credu bod y frwydr yn aml yn cael ei hanwybyddu gan y syniad bod y gymuned, yn benodol dynion hoyw, yn grŵp cyfunol o bobl feiddgar a lliwgar sy’n hapus i fod yn eofn a disglair a hardd yn eu ffordd eu hunain, waeth beth ddaw. Does dim trafodaeth mewn gwirionedd am y monologau mewnol, yr anawsterau, yr ofn sydd gennym pan fyddwn yn cerdded i lawr y stryd oherwydd ‘ydw i’n edrych yn rhy hoyw? Ydw i’n cerdded yn rhyfedd? Mae pobl yn edrych: Dylwn i roi’r gorau i ddal llaw fy mhartner’.

Credaf fod y frwydr hon, yn ogystal â phrofiad personol a gwahanol pawb o fod yn rhan o’r gymuned LGBTQ, wedi’i chrynhoi mewn sgwrs a gefais gyda ffrind dros ginio: roedden ni’n siarad am sgwrs LGBT a welsom yng Ngŵyl y Gelli a oedd yn canolbwyntio ar Ymgyrch Stonewall a’r brwydrau yr ydym wedi eu hwynebu a’r llwyddiannau a roddwyd i’r gymuned – nodwch fod yr un hawl â’n cyfoedion heterorywiol a chydryweddol wedi cael ei rhoi i ni, sy’n golygu y gellir ei thynnu oddi arnom yr un mor hawdd. Arweiniodd y sgwrs at gwestiwn, sef a fydden ni’n cymryd pilsen er mwyn ein gwneud yn syth. Dywedais i ‘na’ heb oedi. Dywedodd fy ffrind y byddai’n cymryd y bilsen. Gofynnodd i mi pam y byddwn i’n dewis byw bywyd ar y cyrion o fod yn ‘normal’, bywyd o orfod edrych dros fy ysgwydd o hyd gan fy mod i’n cerdded/siarad mewn ffordd benodol, bywyd o deimlo bod pobl ond yn fy nioddef a ddim yn fy nerbyn yn llwyr. Fe wnes i ei atgoffa’n garedig bod angen weithiau edrych am yr heulwen yn y glaw a gwybod ein bod yn gallu byw’r bywyd yr oedd cymaint o bobl cyn ein hamser ni wedi marw yn breuddwydio amdano: mae eu gweddïau, eu cryfder, a’u gwrthryfela yn dal i’n hamddiffyn.

Os ydych chi wedi llwyddo i aros gyda mi, hoffwn dalu teyrnged i’r rhai hynny a ddaeth o fy mlaen i na fyddaf byth yn gallu cyfarfod â nhw, na fyddaf byth yn gallu diolch iddynt. Mae gormod o’u henwau a’u straeon wedi mynd yn angof. Pam? Dydw i ddim yn gwybod. A yw cymdeithas yn ceisio dileu ein hanes? Mae’n bosib. A yw cymdeithas yn ceisio osgoi euogrwydd drwy beidio â sôn amdanynt? Efallai wir. A yw absenoldeb yr arwyr hyn yn dal i effeithio ar fywydau miloedd o unigolion LGBTQ sy’n dal i deimlo nad ydynt yn perthyn? Yn bendant. Beth bynnag ydyw, rwy’n galaru amdano. Rwy’n galaru am yr hanes, y balchder, y gelfyddyd, a’r doethineb sydd wedi marw gyda’r dynion hoyw, y lesbiaid, yr unigolion traws ac anneuaidd, pobl ddeurywiol, yr actifyddion, y cariadon, y meddylwyr, y bobl queer, y rhai a oedd yn caru gormod, y rhai wnaeth ymddiried gormod, y rhai wnaeth gamgymeriad gwirion ar noson allan oherwydd eu bod yn ceisio dianc rhag realiti creulon eu byd yn llawn casineb. Rwy’n ddig bod bywydau, cariadon a cholled y bobl hyn yn cael eu tanseilio yn gyson mewn gwledydd ledled y byd. Rwy’n ddig fy mod i’n dal yn anghyfreithlon mewn dros 70 o wledydd. Rwy’n ddig bod rhai yn protestio yn erbyn addysgu plant am wahanol fathau o deuluoedd. Rwy’n ddig bod pobl yn anwybyddu’r ffaith bod unigolion LGBTQ yn fwy tebygol o gael eu heffeithio gan broblemau iechyd meddwl. Rwy’n ddig bod pobl yn meddwl bod ein brwydr ni drosodd gan fod rhai deddfau wedi cael eu newid i’n hamddiffyn.

Ond a fyddwn i’n cymryd pilsen er mwyn fy ngwneud i’n syth? Ddim o gwbl.

Pe byddai’n rhaid i mi ei wneud eto, yna fe fyddwn i. Mi fuaswn i’n mynd drwy’r holl fwlio, y gwrthod, cael pobl yn dweud bod y diafol y tu mewn i mi y mae’n rhaid gweddïo i gael gwared arno, clywed y dylwn i farw, clywed nad ydw i’n deilwng, clywed nad yw Duw yn fy ngharu i, clywed na ddylwn i fod wedi cael fy ngeni, clywed y byddaf yn cael fy llosgi yn uffern, cael rhywun yn gofyn i mi adael yr eglwys, cael rhywun yn poeri arnaf ar nosweithiau allan, clywed nad ydw i’n ddyn go iawn, clywed na fyddaf i byth yn hapus, oherwydd mae derbyn fy hun a dysgu, bob dydd, i garu fy hun yn wyneb trallod wedi bod werth y cyfan.

Nid wyf yn gwybod ble y byddwn i heddiw pe na bawn i’n ddigon dewr i dderbyn fy hun a gadael i fy hun garu er mwyn canfod pwy ydw i: dyn hoyw balch.

Am y rhesymau hyn rwy’n gweithio yn y Cynulliad ac yn cymryd rhan weithgar yn rhwydwaith OutNAW: gyda staff mor agored gynhwysol ac amrywiol, roedd hi’n bwysig i mi weithio mewn lle sy’n ganolog i ddatblygiad Cymru sy’n arddangos y diwylliant sydd ei angen arnom i wneud yn siŵr nad yw unrhyw lais deurywiol yn mynd heb ei glywed, nad yw unrhyw unigolyn traws yn clywed na allant fod pwy ydyn nhw, nad yw unrhyw berson lesbaidd yn ei harddegau yn cael ei bwlio am fod yn hi ei hun, nad oes rhaid i unrhyw ddyn hoyw feddwl p’un a fyddent yn cymryd pilsen er mwyn bod yn syth.

fflag enfys