Category: Amrywiaeth a Chynnwys

Dathlu Dydd Miwsig Cymru

Heddiw, rydym yn dathlu Dydd Miwsig Cymru (Welsh Language Music Day), sef digwyddiad blynyddol a gynhelir ledled Cymru i godi ymwybyddiaeth am gerddoriaeth o Gymru. Eleni, bydd aelodau o staff Cynulliad Cenedlaethol Cymru yn manteisio ar y cyfle i ddathlu Dydd Miwsig Cymru, a hynny fel rhan o’n hymrwymiad parhaus i hyrwyddo’r defnydd o’r Gymraeg yn y sefydliad. Drwy gydol yr wythnos ddiwethaf, mae dysgwyr Cymraeg yn y Cynulliad wedi bod yn dysgu’r geiriau i Hen Wlad fy Nhadau, sef yr anthem genedlaethol.

Rhestr o hoff ganeuon Elin Jones AC, Llywydd Cynulliad Cenedlaethol Cymru.

Fel rhan o’n dathliadau ar gyfer Dydd Miwsig Cymru, mae Elin Jones AC, Llywydd Cynulliad Cenedlaethol Cymru, wedi creu rhestr o’i hoff ganeuon Cymraeg er mwyn rhoi blas o’r arlwy cyfoethog sy’n bodoli yn y diwydiant.

1. Ethiopia Newydd – Geraint Jarman a’r Cynganeddwyr
2. Tyrd Olau Gwyn – Cowbois Rhos Botwnnog
3. Sebona Fi – Yws Gwynedd
4. Cymru, Lloegr a Llanrwst – Y Cyrff
5. Cwcwll – Beganifs
6. Rhedeg i Paris – Yr Anhrefn
7. Harbwr Diogel – Elin Fflur
8. Julia Gitar – Jess
9. Cân i Gymry – Datblygu
10. Coffi Du – Gwibdaith Hen Frân

Wrth siarad am ei detholiad, dywedodd y Llywydd:

“Rwy’n hynod falch o gefnogi’r ymdrech hon i sicrhau y gall pobl Cymru glywed y gerddoriaeth amrywiol sydd ar gael yn Gymraeg ac yn Saesneg. Tyfais i fyny yn gwrando ar fandiau Cymraeg, ac rwyf wedi llunio detholiad o’m hoff gerddoriaeth Gymraeg, gan gynnwys rhai o’r caneuon yr oeddwn yn gwrando arnynt pan oeddwn yn ifanc iawn, a rhai o’r caneuon mwy diweddar yn niwydiant bywiog cerddoriaeth bop Cymru”.

Y Senedd yn paratoi i gynnal gig arbennig ar Ddydd Gŵyl Dewi


Gan barhau â thema Dydd Miwsig Cymru, rydym yn cyfri’r dyddiau tan 1 Mawrth, pan fydd y Senedd yn cynnal gig arbennig iawn i ddathlu Dydd Gŵyl Dewi. Bydd GDSD yn gyfle gwych i ddathlu talent gerddorol orau Cymru, gyda pherfformiadau gan:

Adwaith
Hannah Grace
Mellt
Reuel Elijah a Mace
Roughion (set DJ)

Cynhelir y digwyddiad mewn partneriaeth â phrosiect Horizons y BBC a’r Selar.

I gael rhagor o wybodaeth am y gig, cliciwch yma.

Bydd mynediad i’r gig yn RHAD AC AM DDIM, ac mae tocynnau ar gael yma.

 

Rydym ar frig Mynegai Cydraddoldeb yn y Gweithle Stonewall UK ar gyfer 2018

Mae Cynulliad Cenedlaethol Cymru wedi cael ei gydnabod fel cyflogwr blaenllaw y DU ar gyfer 2018 ar gyfer pobl lesbiaidd, hoyw, deurywiol a thrawsrywiol ym Mynegai Cydraddoldeb yn y Gweithle diweddaraf Stonewall.

Dyma’r tro cyntaf inni fod ar frig y rhestr a daw ddeng mlynedd ers inni gael ein cynnwys yn y mynegai am y tro cyntaf. Ers hynny, rydym wedi gweithio’n ffordd i fyny’n raddol ac wedi ymddangos yn y deg uchaf am y pedair blynedd diwethaf.

Logo Stonewall - Cyflogwr Y Flwyddyn    Logo stonewall - Prif Gyflogwr Traws

Logo Stonewall - Canmoliaeth Perfformwyr Disglair        Logo Stonewall - Grwp Rhwydwaith Cymeradwyaeth Uchel

Arweinydd ar gyfer cydraddoldeb yn y gweithle

Mae Stonewall hefyd wedi canmol ein gwaith yn hyrwyddo, cydnabod a chefnogi cydraddoldeb trawsryweddol, gan ein nodi fel un o ddim ond 11 o sefydliadau enghreifftiol yn y DU.

At hynny, mae ein rhwydwaith gweithle LHDT, OUT-NAW, wedi cael Cymeradwyaeth Uchel fel Grŵp Rhwydwaith ac rydym wedi sicrhau statws sefydliad sy’n Perfformio’n Rhagorol oherwydd ein perfformiad rhagorol cyson yn y Mynegai.

Rydym yn falch o fod yn arwain y ffordd nid yn unig yng Nghymru ond ledled y DU.

Gweithio tuag at ffyrdd mwy blaengar o weithio

Cawsom ein cynnwys yn y mynegai am y tro cyntaf yn 2008, lle’r oeddem yn safle 208 yn y DU. Ers hynny, rydym wedi gwneud newidiadau cynyddol i’n polisïau a’n gweithgareddau ymgysylltu sydd wedi arwain at ein gwelliant parhaus a’n hymagwedd tuag at gynhwysiant LHDT ac felly, ein cynnydd yn y Mynegai.

2008 2009 2010 2011 2012 2013 2014 2015 2016 2017 2018
208 73 47 42 20 26 11 4 3 5 1

Rydym yn senedd fodern ac rydym yn croesawu ffyrdd creadigol o feddwl. Rydym wedi bod yn rhagweithiol ac yn flaengar yn ein hymagwedd tuag at gydraddoldeb LHDT erioed, gan greu amgylchedd a diwylliant cynhwysol drwy wneud newidiadau ystyrlon bach.

Rydym wedi defnyddio dull cynyddol tuag at gynhwysiant LHDT, gan ddefnyddio adborth gan Stonewall ac arfer gorau i fod yn sefydliad blaengar. Mae bod yn gynhwysol yn ein DNA. Roedd Deddf Llywodraeth Cymru 2006 a sefydlodd Comisiwn y Cynulliad fel corff corfforaethol yn nodi bod yn rhaid i’r Cynulliad wneud trefniadau priodol o ran cadarnhau bod ei swyddogaethau’n cael eu harfer gan ystyried yr egwyddor y dylid sicrhau cyfle cyfartal i bawb. Felly mae’n rhan o bopeth rydym yn ei wneud.

Arwain newid drwy arweinyddiaeth gref

Rydym yn falch o gael arweinyddiaeth ymroddedig a chadarn ar draws y sefydliad ac ar wahanol lefelau yn y sefydliad, o’r Llywydd, y Prif Weithredwr a’r Cyfarwyddwyr, i’n tîm Amrywiaeth a Chynhwysiant a chynghreiriad ac aelodau’r rhwydwaith ar draws y Cynulliad.

Mae ein hymagwedd gynhwysol yn weladwy i staff ac ymwelwyr. Rydym yn chwifio baner yr enfys ar adegau penodol drwy gydol y flwyddyn, mae ein tystysgrif a’n gwobrau Mynegai Cydraddoldeb yn y Gweithle gan Stonewall wedi’u harddangos yn ein derbynfa, mae cynghreiriad ac aelodau’r rhwydwaith yn gwisgo cortynnau gwddf lliwiau’r enfys ac mae gan ein cynghreiriad arwydd ar eu desg sy’n cyhoeddi eu cefnogaeth i Gydweithwyr LHDT.

Pan ymunodd un cydweithiwr â’r sefydliad, roedd yn falch iawn o’n hymagwedd tuag at gynhwysiant LHDT, gan nodi “cymerodd dair blynedd imi ddod allan yn fy hen swydd; ac fe gymerodd lai na thair wythnos imi wneud yr un peth yma. Roedd hi’n glir ar unwaith fod pawb yn derbyn pawb arall fel y maen nhw.”

photo - LGBT staff and allies with the rainbow flag

Dywedodd Elin Jones AC, Llywydd Cynulliad Cenedlaethol Cymru:

“Mae’n anrhydedd mawr cael ein cydnabod gan Stonewall fel cyflogwr blaenllaw y DU ar gyfer pobl lesbiaidd, hoyw, deurywiol a thrawsrywiol.

“Mae gan y Cynulliad Cenedlaethol amrywiaeth a chynhwysiant wrth wraidd ei rôl yn cynrychioli pobl Cymru.

“Rydym yn falch o gefnogi ein rhwydwaith staff LHDT a pharhau i weithio i greu diwylliant cynhwysol – nid yn unig i’r bobl sy’n gweithio yma ond i’r bobl yr ydym yn eu cynrychioli ar draws cymunedau amrywiol Cymru gyfan.

“Fel senedd Cymru, mae’n iawn y dylem arwain drwy esiampl i ddangos yr hyn y gellir ei gyflawni gyda’r agweddau, yr arweinyddiaeth a’r penderfyniad cywir.

“Mae hwn nid yn unig yn ddiwrnod gwych i’r Cynulliad, ond mae hefyd yn newyddion da i staff yn y nifer o sefydliadau eraill yng Nghymru a gynrychiolir yn y 100 o gyflogwyr gorau. Mae hyn yn dangos bod Cymru yn amlwg yn deall gwerth darparu gwasanaethau a pholisïau cynhwysol ac rwy’n llongyfarch pawb.”

Dywedodd Joyce Watson AC, Comisiynydd y Cynulliad sy’n gyfrifol am amrywiaeth a chynhwysiant:

“Mae hwn yn gyflawniad rhagorol sy’n dod ddeng mlynedd ers i’r Cynulliad gael ei gydnabod am y tro cyntaf ym Mynegai Cydraddoldeb yn y Gweithle Stonewall.

“Mae’n brawf o ymroddiad ein staff, yn enwedig ein tîm amrywiaeth a chynhwysiant, yn croesawu ac yn cynnwys cydraddoldeb LHDT ym mhob agwedd ar ein gwaith yn cynrychioli pobl Cymru.

“Mae ein llwyddiant yn dangos y gall newidiadau cynyddol mewn polisi ac ymagwedd barod tuag at newid agweddau gyflawni llawer iawn a bod yn enghraifft i eraill.”

 

I gael rhagor o wybodaeth am weithio i Gynulliad Cenedlaethol Cymru, ewch i’n tudalennau Recriwtio.

Diwrnod Rhyngwladol Pobl Anabl – 3 Rhagfyr

Cynhelir Diwrnod Rhyngwladol Pobl Anabl (IDDP) bob blwyddyn i hyrwyddo cydraddoldeb i bobl anabl, i helpu i dorri rhwystrau ac i gefnogi urddas, hawliau a lles pobl anabl.

Yn y Cynulliad, rydym yn falch o fod yn gyflogwr hygyrch ac yn ddarparwr gwasanaethau hygyrch. Rydym yn gwerthfawrogi cyfraniad ein staff anabl ac yn cydnabod manteision ymgysylltu â phobl anabl ledled Cymru wrth wneud ein gwaith.

Eleni, rydym yn ymfalchïo y byddwn yn ymuno â chymuned o weithwyr anabl, rhwydweithiau a sefydliadau anabledd, i ddathlu Diwrnod Rhyngwladol Pobl Anabl drwy oleuo’r Senedd yn borffor.

Y Senedd wedi'i goleuo'n borffor
Y Senedd wedi’i goleuo’n borffor

Fel cyflogwr, rydym yn cefnogi anghenion ein staff anabl yn llawn drwy ddarparu addasiadau yn y gweithle, fel amrywiol opsiynau ar gyfer gweithio’n hyblyg, yn darparu offer penodol i ddiwallu eu hanghenion neu’n addasu eu sbardunau absenoldeb oherwydd salwch. Mae gennym hefyd bolisïau staff cefnogol fel y polisi iechyd meddwl, a mynediad at Nyrs Iechyd Galwedigaethol ar y safle, rhwydwaith staff anabledd prysur, sef EMBRACE, a mynediad at wasanaethau cwnsela a chynghori.

Drwy gydol y flwyddyn byddwn yn dathlu ac yn hyrwyddo cydraddoldeb i bobl anabl, gan gynnwys y Diwrnod Mynediad i Bobl Anabl a’r Diwrnod Ymwybyddiaeth o Iechyd Meddwl. Lansiwyd ein Rhwydwaith Iechyd Meddwl yn ddiweddar i’n helpu i hyrwyddo iechyd meddwl a lles yn ein sefydliad.

Llun o Karen, cyd-Gadeirydd Rhwydwaith Mindful y Cynulliad, gydag Alex a Dora, y ci therapi.
Llun o Karen, cyd-Gadeirydd Rhwydwaith Mindful y Cynulliad, gydag Alex a Dora, y ci therapi.

Dyma ddyfyniadau gan rai o’n staff anabl sy’n amlinellu’r gefnogaeth a gânt:

• “Dydw i ddim yn teimlo’n anabl pan rwy’n dod i’r gwaith am fy mod i’n cael fy mharchu ac mae fy sgiliau’n cael eu gwerthfawrogi.”
• “Mae parodrwydd y Cynulliad i ymgysylltu â’r rhwydwaith staff i bobl anabl yn gwneud imi deimlo ei fod wir yn gwerthfawrogi fy marn a’m profiadau. Rwy’n teimlo fy mod yn helpu i wneud gwahaniaeth go iawn i’r sefydliad a’i staff.”
• “Mae cefnogaeth barhaus y tîm iechyd a diogelwch wedi ei gwneud yn haws i mi ddod i’r gwaith.”

Mae ein hymrwymiad i gydraddoldeb a chynhwysiant ar gyfer pobl anabl wedi cael ei gydnabod gan nifer o gyrff allanol. Rydym wedi:

• ein henwi yn gyflogwr anabledd Hyderus,
• ennill y Marc Siarter yn Uwch na Geiriau gan Action on Hearing Loss, a chael un o’u Gwobrau Rhagoriaeth Cymru, a
• ein hachredu gan y Gymdeithas Awtistiaeth Genedlaethol fel sefydliad Awtistiaeth Gyfeillgar.

 

Autisim-Friendly-Senedd-image
Llun o’r Senedd a logo bod yn ystyriol o bobl ag awtistiaeth’

Yn ddiweddar, cawsom ein hachredu fel sefydliad sy’n Gyfeillgar i Awtistiaeth. Dywedodd Joyce Watson AC, yr Aelod Cynulliad sy’n gyfrifol am gydraddoldeb yng Nghomisiwn y Cynulliad:

 

“Rydym wrth ein bodd o gael ein cydnabod unwaith eto fel sefydliad sy’n mynd i’r afael â mynediad cyfartal yn ddifrifol iawn. Rydyn ni yma i gynrychioli holl bobl Cymru ac mae gennym ddyletswydd i sicrhau bod ein cyfleusterau, ein gwasanaethau a’n gwybodaeth yn hygyrch i bawb. ”

Comisiwn Cynulliad Cenedlaethol Cymru yw’r corff sy’n darparu eiddo, staff a gwasanaethau ar gyfer y Cynulliad a’i Aelodau.

Meddai Ann Jones AC, Dirprwy Lywydd y Cynulliad:

“Mae cydweithio ag Embrace a’n partneriaid allanol yn hanfodol bwysig, gan ei fod yn ein helpu i gadw at yr arferion gorau o ran dileu rhwystrau o ran mynediad a chynhwysiant. Mae hyn yn ein helpu ni fel sefydliad i sicrhau y byddwn yn gwneud gwelliannau cynaliadwy ac ystyrlon ar gyfer ein staff a phobl Cymru.”

Os hoffech wybod mwy am y Cynulliad, gallwch edrych ar ein gwefan, neu dilynwch ni ar Twitter neu Facebook. Mae gwybodaeth am weithio yn y Cynulliad ar gael hefyd ar ein gwefan. Mae gwybodaeth i ymwelwyr sydd â chyflwr ar y sbectrwm awtistiaeth ar gael ar ein tudalennau pwrpasol.

Os hoffech gysylltu â’r Tîm Amrywiaeth, gallwch gysylltu â ni drwy e-bost yn Amrywiaeth@cynulliad.cymru neu dros y ffôn ar 0300 200 7455. Rydym yn croesawu galwadau drwy gyfnewidfa testun a gallwn ddarparu gwybodaeth mewn fformatau eraill ar gais.

10 o ffeithiau ar gyfer 10 mlynedd o ddathlu Mis Hanes Pobl Dduon yng Nghymru

Mae Mis Hanes Pobl Dduon Cymru yn dathlu deng mlwyddiant eleni. Dathlwyd Mis Hanes Pobl Dduon yn y DU am y tro cyntaf yn 1987, mae hefyd yn nodi 30 mlwyddiant eleni.

Map cy

Bob mis Hydref yn y DU, mae Mis Hanes Pobl Dduon yn dathlu llwyddiannau pobl dduon a’u cyfraniadau at ddatblygiad cymdeithas; technoleg; yr economi; y celfyddydau a diwylliant ym Mhrydain. Darllenwch fwy am hanes Mis Hanes Pobl Dduon.

Wrth ddathlu 10 mlynedd, dyma ichi 10 o ffeithiau nad oedd yn wybyddus i chi o bosibl:

1. Ym 1987, yn Llundain yn unig y dathlwyd BHM, ond mae bellach yn ddigwyddiad ledled y DU gyda dros 6,000 o ddigwyddiadau yn cael eu cynnal ar draws y DU bob mis Hydref. Mae Canada ac America yn dathlu Mis Hanes Pobl Dduon ym mis Chwefror.

2. Cafodd y canlynol eu dyfeisio gan bobl o dras Du a Lleiafrifoedd Ethnig:

Miniwr pensiliau, system pŵer ceir troli, goleuadau traffig cyntaf, y tryc ysgubo, y rhaw lwch fach, y drws codi awtomatig, y sychwr dillad cyntaf, ysgol ddianc rhag tân, y diffoddwr tân, y ffilament carbon ar gyfer y bwlb, y bag plasma gwaed, y bwrdd smwddio, y brwsh gwallt, y sythwr gwallt, beic tri olwyn a mwy.

3. Daeth Betty Campbell yn brifathrawes ddu gyntaf Cymru yn y 1970au, gyda’i swydd yn Ysgol Gynradd Mount Stuart yn Butetown, Caerdydd.

4. Mae gan Gymru un o’r cymunedau aml-ethnig hynaf yn y DU, sef yn ardal Tiger Bay yng Nghaerdydd. Setlodd morwyr a gweithwyr o dros 50 o wledydd yma.

5. Ganwyd Leonora Brito yng Nghaerdydd, cafodd ei magu a’i dylanwadu gan gymuned amlddiwylliannol Tiger Bay, a cheisiodd ail-greu gwerthoedd y gymdeithas honno yn ei hygrifennu. Roedd ei gwaith yn cynnig golwg unigryw ar y gymdeithas Gymreig Affro-Caribi, a gafodd ei thangynrychioli mewn ysgrifennu am Gymru nes i’w gwaith hi ymddangos. Enillodd ei stori ‘Dat’s Love’ gystadleuaeth stori fer Rhys Davies yn 1991. Bu farw yn 2007.

6. Mohammed Asghar (Oscar) AC oedd cynghorydd Mwslimaidd cyntaf Cymru, yn cynrychioli ward Victoria yng Nghyngor Dinas Casnewydd yn 2004. Daeth yn aelod lleiafrifol ethnig a Mwslimaidd cyntaf Cynulliad Cenedlaethol Cymru pan etholwyd ef yn 2007.

7. Adroddodd cyfrifiad 2011 fod 18,276 o bobl Affricanaidd yng Nghymru, sy’n gyfystyr â 0.6 y cant o boblogaeth Cymru.

8. Yn 2008 daeth Vaughan Gething AC yn Llywydd y TUC ieuengaf yng Nghymru, ac y person du cyntaf yn y rôl.

9. Daeth Eddie Parris, a aned ym Mhwllmeurig ger Cas-gwent, y chwaraewr pêl-droed du cyntaf i chwarae i Gymru, gan chwarae ei unig gêm ryngwladol yn erbyn Gogledd Iwerddon ym Belfast ym 1931 – bron i hanner canrif cyn i chwaraewr rhyngwladol du cyntaf Lloegr ennill cap rhyngwladol.

10. Mae’r barnwr Ray Singh, CBE, Cadeirydd Cyngor Hil Cymru, bellach wedi ymddeol fel Barnwr Rhanbarth. Ef oedd y barnwr cyntaf o gefndir ethnig lleiafrifol i eistedd ar y fainc yng Nghymru.

I gael rhagor o wybodaeth am ddathliadau Mis Hanes Pobl Dduon ledled Cymru, ewch i wefan Mis Hanes Pobl Dduon.

Mis Hanes Pobl Dduon: Mae’r mis Hydref hwn yn un arbennig

Dathlwyd Mis Hanes Pobl Dduon yn y DU am y tro cyntaf yn 1987, ac mae eleni’n nodi 30 mlwyddiant. Mae Mis Hanes Pobl Dduon Cymru hefyd yn dathlu deng mlwyddiant eleni.

Abi Lasebikan, Cyd-Gadeirydd rhwydwaith cydraddoldeb yn y gweithle ar gyfer Hil, Ethnigrwydd a Threftadaeth Ddiwylliannol, yn sôn am hanes y mis…

Header

Bob mis Hydref yn y DU, mae Mis Hanes Pobl Dduon yn dathlu llwyddiannau pobl dduon a’u cyfraniadau at ddatblygiad cymdeithas; technoleg; yr economi; y celfyddydau a diwylliant ym Mhrydain.

A people without the knowledge of their past history, origin and culture is like a tree without roots” – Marcus Garvey

Hanes

Cynhaliwyd y digwyddiad cyntaf erioed yn Llundain ym 1987.  Cydnabyddir mai Akyaaba Addai Sebo, sef cydlynydd Prosiectau Arbennig yng Nghyngor Llundain Fwyaf (y GLC) ar y pryd, a ddechreuodd Mis Hanes Pobl Dduon yn y DU gan ddod â phobl at ei gilydd i roi cychwyn cadarn iddo.

A colleague of mine, a woman, came to work one morning, looking very downcast and not herself. I asked her what the matter was, and she confided to me that the previous night when she was putting her son Marcus to bed he asked her, “Mum, why can’t I be white?”

The mother was taken aback. She said that she was so shocked that she didn’t know how to respond to her son. The boy that had been named after Marcus Garvey had asked why he couldn’t be white!

– Akyaaba Addai Sebbo

Black_History_Month_1987_002

Cydnabyddir mai Akyaaba Addai Sebo, sef cydlynydd Prosiectau Arbennig yng Nghyngor Llundain Fwyaf (y GLC) ar y pryd, a ddechreuodd Mis Hanes Pobl Dduon yn y DU gan ddod â phobl at ei gilydd i roi cychwyn cadarn iddo . Gellir dadlau bod y symbyliad ar gyfer y digwyddiad wedi dod ddeunaw mis cyn i’r GLC gael ei ddiddymu ym 1986. Yn ystod y misoedd yn arwain at ddiddymu’r GLC, gwelwyd ymdrech ar y cyd i ddod o hyd i ffyrdd o barhau â’i waith cydraddoldeb blaengar. Uned Bolisi Strategol Llundain, a oedd yn cynnwys 15 Awdurdod Lleol, a ysgwyddodd y cyfrifoldeb am y rhannau radical o’r GLC ar ôl ei ddiddymu.

 

Mae Linda Bellos, arweinydd Cyngor Lambeth ar y pryd, yn cofio Ansell Wong, Pennaeth yr Uned Lleiafrifoedd Ethnig ar y pryd, yn cysylltu â hi gyda’r syniad o ddechrau Mis Hanes Pobl Dduon yn y DU. Continue reading “Mis Hanes Pobl Dduon: Mae’r mis Hydref hwn yn un arbennig”

Wythnos Amrywiaeth a Chynhwysiant: Amrywiaeth Oedran yn y Gweithle: Gweithio amlgenhedlaeth

Erbyn hyn mae cyflogwyr yn gweld pum cenhedlaeth wahanol o weithwyr yn gweithio ochr yn ochr yn eu gweithleoedd. Mae’r pum cenhedlaeth wahanol yn cael eu diffinio fel a ganlyn:

  • Traddodiadol: 70 oed – 80+;
  • y Babyboomers: 50 oed – 60au hwyr;
  • Cenhedlaeth X: 30au hwyr – 40au hwyr;
  • Cenhedlaeth Y / y Millennials: 20 oed – 30au cynnar;
  • a Chenhedlaeth Z / Brodorion Digidol: a enir ar hyn o bryd – arddegau hwyr. (Ffynhonnell: Virgin.com)

Mae oedi cyn ymddeol a hirhoedledd cynyddol yn golygu bod gennym weithluoedd sy’n heneiddio ac sydd felly’n dod yn fwyfwy amlgenhedlaeth. Er bod hyn ynddo’i hun yn cyfoethogi gweithleoedd, bydd angen i gyflogwyr ystyried gwahanol anghenion, safbwyntiau, setiau sgiliau a dulliau cyfathrebu eu staff ar draws y cenedlaethau i sicrhau amgylchedd gwaith cynhwysol a chynhyrchiol. Bydd cydweithio a sicrhau bod gweithwyr yn deall ac yn gwerthfawrogi amrywiaeth oedran hefyd yn allweddol i feithrin cynhwysiant yn y gweithle.

Mae Comisiwn y Cynulliad yn cydnabod yr heriau hyn. I’r perwyl hwn, nod cyffredinol ein Strategaeth Amrywiaeth a Chynhwysiant yw parhau i feithrin gweithle cynhwysol a chydweithredol sy’n ystyried yr holl nodweddion gwarchodedig, gan gynnwys oedran. Rydym hefyd wedi datblygu modiwl hyfforddi, cyflwyniad i ragfarn anymwybodol, ar gyfer ein staff. Mae ein rhwydweithiau cydraddoldeb yn y gweithle yn amlgenhedlaeth ac yn gweithio ar y cyd. Rydym hefyd yn cynnal arolygon staff blynyddol sy’n rhoi cyfle i staff fynegi eu barn am y gweithle.

Fel cyflogwr, rydym yn cydnabod yr amrywiaeth gyfoethog sy’n bodoli o fewn amgylchedd gwaith amlgenhedlaeth ynghyd â’r ehangder o greadigrwydd, setiau sgiliau a safbwyntiau yr ydym yn elwa ohonynt. Byddwn yn gwneud popeth o fewn ein gallu i gydnabod hyn wrth inni symud ymlaen i gyflawni ein Strategaeth Amrywiaeth a Chynhwysiant dros y blynyddoedd nesaf.

Wythnos Amrywiaeth a Chynhwysiant: Y Cynulliad fel Cyflogwr Cynhwysol

Rydym yn ymdrechu i fod yn gyflogwr cynhwysol sy’n cefnogi anghenion pawb sy’n gweithio yma. Mae gennym nifer o dimau, polisïau a gweithdrefnau ar waith i’n helpu i ddatblygu diwylliant cynhwysol, ac i sicrhau bod ein staff yn cael eu cefnogi, ac yn gallu mynegi eu hunain a chyflawni eu potensial.

“Rwy’n credu ei bod yn bwysig bod y Cynulliad yn arwain y ffordd o ran hyrwyddo diwylliant sefydliadol cynhwysol, a’i fod yn gorff seneddol modern a hygyrch y gall pobl o ystod amrywiol o gefndiroedd, ryngweithio yn hawdd ac yn ystyrlon ag ef. Mae’n ddyletswydd arnom ni yng Nghynulliad Cenedlaethol Cymru i arwain yn hyn o beth, i rannu ein profiadau, ac i sicrhau bod gwerthoedd cydraddoldeb, amrywiaeth a chynhwysiant yn cael eu parchu a’u harfer gan bawb,”

Elin Jones AC, Llywydd, Cynulliad Cenedlaethol Cymru.

Rhwydweithiau yn y gweithle

Mae ein rhwydweithiau cydraddoldeb yn y gweithle yn ein helpu i hyrwyddo cynhwysiant yn fewnol ac yn allanol drwy fwrw ymlaen ag ymgyrchoedd dros amrywiaeth, gan ddarparu cefnogaeth gan gynghreiriaid, rhannu arfer gorau a thrwy helpu Comisiwn y Cynulliad i ystyried cydraddoldeb, amrywiaeth a chynhwysiant yn ein gwaith.

Maent yn cynnig lle er mwyn i bobl sy’n uniaethu â grŵp nodwedd warchodedig a/neu sydd â diddordeb mewn materion sy’n ymwneud â mater amrywiaeth penodol, ddod at ei gilydd. Maent yn helpu i sicrhau amgylchedd gwaith diogel, cynhwysol ac amrywiol ar gyfer  bawb. Yr wythnos hon, rydym yn lansio MINDFUL, ein rhwydwaith iechyd meddwl a lles meddyliol.

Cydnabyddiaeth allanol

Rydym wedi cael nifer o wobrau sy’n dangos ein hymrwymiad i gefnogi ein staff, creu amgylchedd gwaith cynhwysol a darparu gwasanaethau cynhwysol. Mae’r safonau hyn yn cydnabod y polisïau staff blaengar sydd gennym ar waith ac sy’n ein helpu i gynnal arferion gorau. Mae ein llwyddiannau diweddar yn cynnwys:

  • cyrraedd y pumed safle ym Mynegai Cydraddoldeb yn y Gweithle Stonewall 2017, cael ein dyfarnu fel y cyflogwr sector cyhoeddus gorau yn y DU, ac wedi ein henwi fel y sefydliad gorau yn y sector cyhoeddus yng Nghymru am y bedwaredd flwyddyn yn olynol. Hefyd, enwyd Ross Davies, ein Rheolwr Amrywiaeth a Chynhwysiant, fel Cynghrair y Flwyddyn Stonewall Cymru;
  • cadw ein gwobr gan Gymdeithas Genedlaethol Awtistiaeth am fod yn gyflogwr a darparwr gwasanaeth sy’n ystyriol o awtistiaeth;
  • cael ein rhestru fel un o’r 10 cyflogwr gorau yn y Du o ran bod yn ystyriol o deuluoedd gan y sefydliad Working Families;
  • cael ein dynodi fel Cyflogwr Hyderus Anabledd a Chyflogwr sy’n gadarnhaol am heneiddio;
  • cadw Safon Aur Buddsoddwyr mewn Pobl, y dyfarniad rhyngwladol ar gyfer rhagoriaeth fyd-eang. Mae sefydliadau sy’n cyrraedd y safon orau o ran cydnabyddiaeth ryngwladol yn dangos y gwaith gorau oll wrth reoli pobl a thrwy gael y wobr aur rydym ni’n dangos ein nod parhaus o fod yn gyflogwr dewis cyntaf.
  • ennill gwobrau rhagoriaeth Action on Hearing Loss Cymru ar gyfer ein gwasanaeth i bobl sy’n fyddar neu sydd â nam ar y clyw; ac
  • cael ein gwobrwyo Marc Siarter ‘Yn Uwch na Geiriau’ yr elusen Action on Hearing Loss.

all benchmark logos 2017

Yr hyn y mae ein staff yn ei ddweud

Un ffordd dda o ddweud wrthych ynglŷn â’r hyn rydym yn ei wneud yw drwy adael i rai aelodau o staff ddweud wrthych yn eu geiriau eu hunain.

“Mae addasiadau wedi’u gwneud i fy mhatrwm gweithio er mwyn sicrhau cydbwysedd rhwng bywyd a gwaith sy’n addas imi, gan gynnwys gweithio oriau cywasgedig a gweithio yn ystod y tymor yn unig. Mae’r addasiadau hyn wedi bod yn arbennig o werthfawr.”

“Cymerodd dair blynedd i mi ‘ddod allan’ yn fy swydd flaenorol; cymerodd lai na thair wythnos i wneud yr un peth fan hyn. Roedd hi’n glir ar unwaith fod pob un yn derbyn pob un arall fel y maen nhw.”

“Dydw i ddim yn teimlo’n anabl pan rwy’n dod i’r gwaith am fy mod i’n cael fy mharchu  ac mae fy sgiliau’n cael eu gwerthfawrogi.”

“Fel aelod o staff sy’n fyddar, rwy’n cael llawer o gefnogaeth yn fy swydd.  Mae fy nghydweithwyr wedi addasu eu harferion gwaith ac rwyf wedi cael yr offer angenrheidiol i’m galluogi i gyfrannu’n llawn i’r tîm.”

“Ers ymuno â’r rhwydwaith staff Pobl Dduon a Lleiafrifoedd Ethnig, rwy’n dawel fy meddwl fod gen i le i ddweud fy nweud, lle mae fy marn yn cael ei gwerthfawrogi. Rwy’n teimlo fy mod yn cael fy nghefnogi yn fy ngwaith ac mae’n rhoi’r hyder imi y gallaf ddylanwadu ar bethau i newid y drefn yn y sefydliad.”

Ymunais â’r rhwydwaith i staff anabl ar ôl cael diagnosis o Ffibromyalgia (FM) rai blynyddoedd yn ôl yn y gobaith o gael rhywfaint o ddylanwad ar y broses o ddatblygu a diwygio polisïau Adnoddau Dynol a pholisïau corfforaethol o ran y ffordd y mae’r polisïau hyn yn effeithio ar bob person anabl (wedi gweithio yn agos gyda’r tîm Amrywiaeth a Chynhwysiant), ond yn enwedig pobl â chyflyrau anweledig fel FM. Rwy’n falch fod y rhwydwaith, drwy siarad ar y cyd, wedi gallu dylanwadu ar rai o’r polisïau hyn a sicrhau newid.”

“Heb gymorth, dealltwriaeth a hyblygrwydd y rheolwyr llinell a chyngor a chefnogaeth gan y nyrs iechyd galwedigaethol rwy’n yn amau ​​y byddwn i yn y gwaith heddiw”